Megum til með að hrósa og benda á tillöguna sem vann samkeppni Reykjavíkurborgar um útivistarsvæði Öskjuhlíðar, framtíðarsýn og -skipulag þess.

Vinningshafar eru landslagsarkitektarnir Þráinn Hauksson, Sif Hjaltdal Pálsdóttir og Svava Þorleifsdóttir hjá teiknistofunni Landslagi en þau unnu tillöguna.

Grunnmynd af vinningstillögu Landslags.

Áhersla er lögð á að halda í svæðið eins og það er en tengja það betur innbyrðis sem og við nágrenni þess. 7 geislar eru myndaðir út frá Perlunni á toppnum með misbröttum stígum en á aðalstígnum Suðurás er minnsti brattinn þar sem sjónlína opnast niður að sjó sem endar í útsýnispalli út yfir sjávarkletta sem eru friðlýstar jarðfræðiminjar. Brattasti stígurinn er suðvesturásinn nefndur metorðastigi þar sem á leiðinni eru ýmsar áskoranir, líkamlegar og andlegar í gegnum skóginn þar sem hann er þéttastur og ævintýralegastur. Geislastígarnir þvera láréttan stíg sem liggur kringum Perluna er nefnist perlufestin og þar með skapast möguleiki á aðgengi fyrir alla.

Perlufestin, láréttir stígar meðfram hlíðinni aðgengilegir öllum.

Efnisval og litasamsetning nýrra stíga er fengin úr náttúru hlíðarinnar sem og minjum á svæðinu, stálið og steypan úr stríðsminjum. Gamlir stígar fá að halda sér og þeim sjarma sem þeir búa nú þegar yfir.

Útsýnispallur við Öskjuhlíð.

Mynd frá Reykjavíkurborg. Stúdentaíbúðir (hvítar) eru í jaðri hlíðarinnar. Perlufesti (brúnn) er stígur sem hringar sig utan um Perluna á þeirri leið verða ýmsir áhugaverðir staðir.

Stúdentaíbúðir munu rísa á milli Nauthólsvegar og Öskjuhlíðar, í nágrenni Háskólans í Reykjavík.

Margar stríðsminjar verða sýnilegri með tilkomu perlufestarinnar.

Í tillögunni er lagt til að söguminjar verði verndaðar, merktar og gerðar sýnilegri.

Spennandi verður að sjá þessa tillögu verða að veruleika.